Nýtt eldhús eftir máli
Friðgeirskur húmor, frygð og fantasía!
Þegar Daníel missir vinnuna fer athygli hans öll smám saman að beinast að eldhúsinnréttingunni. Og möguleikarnir á úrbótum eru svo margir og heillandi! En Daníel veitist erfitt að vekja ástríðu konu sinnar, Soffíu, gagnvart verkefninu. Hann gleymir sér löngum stundum yfir kynórum um starfsfólk innréttingabúða og ekki bætir úr skák þegar búsáhöldin lifna við og leggja orð í belg.
Fantasía og raunveruleiki renna saman á grátbroslegan hátt í þessu nýja leikriti eftir Friðgeir Einarsson. Í senn bráðfyndið og alvarlegt verk um tilbreytingarleysi hversdagsleikans, einmanaleikann og löngun eftir að mynda tengsl. Hvað er það í raun sem við viljum í lífinu? Þegar búið er að gera allt, ná öllum markmiðum, hvað þá?
Stórskemmtilegt og lúmskt verk um hversdagsleikann og knýjandi þörf okkar fyrir tilgang og nánd.
Gáskafullur könnunarleiðangur um íslenskan hversdagsleika
Sýn Friðgeirs Einarssonar á hversdagsleikann er í senn næm, nöpur og fyndin. Hann hefur komið víða við í íslensku leikhúslífi síðustu ár, sem leikskáld, leikari og einn af meðlimum leikhópsins Kriðpleirs. Nýtt eldhús eftir máli er fyrsta leikritið sem Friðgeir skrifar fyrir leikhóp Þjóðleikhússins, en það var flutt sem verk í vinnslu á leikritahátíð Þjóðleikhússins, Gula dreglinum, vorið 2025.
Titill verksins felur í sér tilvísun í þekkta smásögu eftir Svövu Jakobsdóttur sem birtist fyrst á prenti árið 1966. Nú, 60 árum síðar, skoðar Friðgeir Einarsson út frá nýju sjónarhorni kynhlutverk og samskipti kynjanna í samtímanum.
Boðið verður upp á umræður með þátttöku listafólks eftir 6. sýningu, fimmtudagskvöldið 24. september.
ViðvaranirViðvaranir vegna notkunar tækni.
Ég hef látið mig dreyma um að snerta borðplötuna. Bókstaflega látið mig dreyma.
