Matthías Tryggvi Haraldsson er listrænn ráðunautur Þjóðleikhússins og dramatúrg í völdum sýningum leikhússins. Hann útskrifaðist af sviðshöfundabraut Listaháskóla Íslands vorið 2018.

Matthías er annar höfunda leikritsins Jólagjöf Skruggu – jólaævintýri leikhúsálfanna sem Þjóðleikhúsið sýnir. Meðal leikrita hans eru Síðustu dagar Sæunnar í Borgarleikhúsinu, Vloggið sem hann skrifaði fyrir Þjóðleikhúsið og Griðastaður sem sýnt var í Tjarnarbíói. Hann stefndi um hríð að heimsyfirráðum sem liðsmaður Hatara. Matthías hlaut Grímuverðlaunin 2023 fyrir leikrit sitt Síðustu dagar Sæunnar og verðlaunin 2019 í flokknum Sproti ársins. Leikrit hans Griðastaður var tilnefnt til Grímunnar en það verk hefur verið þýtt og sýnt hjá leikhópnum En Gang Til í Danmörku og á hátíðinni New Nordics í Bretlandi.