Íslensk leikritun og höfundastarf
Að undanförnu hefur Þjóðleikhúsið lagt höfuðáherslu á frumsköpun og nýja íslenska leikritun. Leikhúsið styður höfunda á ólíkum aldri og með ólíkan bakgrunn með margvíslegum hætti. Við tökum handrit og hugmyndir að leikritum á ólíkum vinnslustigum til skoðunar, köllum reglulega eftir leikritum af ólíku tagi, kaupum tilbúin verk og ráðum höfunda til að skrifa ný verk.
Á hverjum tíma er fjöldi nýrra verka í vinnslu og þróun í Þjóðleikhúsinu. Nú eru leikverk eftir höfundana Hafstein Níelsson, Ólíver Þorsteinsson, Hrafnhildi Hagalín, Tyrfing Tyrfingsson, Mazen Maarouf, Ebbu Katrínu Finnsdóttur, Unu Þorleifsdóttur, Birni Jón Sigurðsson og fleiri í þróun í leikhúsinu okkar.
Kallað eftir leikritum
Þjóðleikhúsið hefur á undanförnum árum kallað reglulega eftir leikritum af tilteknu tagi, m.a. verkum sem varða fjölbreytileika samfélagsins, barnaleikritum, hádegisleikritum og leikritum eftir kvenleikskáld og leikskáld af erlendum uppruna. Nokkur leikrit sem bárust hafa þegar ratað á svið og enn önnur eru nú í þróun á vegum leikhússins.
Vinnustofa höfunda
Leikhúsið býður völdum höfundum sem eru að þróa spennandi verk vinnuaðstöðu í Þjóðleikhúsinu í 1-2 mánuði í senn. Höfundar fá aðgang að skrifstofu og býðst að eiga samtal við dramatúrga og annað listafólk hússins. Á þessu leikári munu höfundar af Gula dreglinum nýta sér vinnustofu höfunda, en einnig Gígja Hilmarsdóttir og Anna Rós Árnadóttir.
Guli dregillinn
Þjóðleikhúsið kynnir með stolti nýja leikritahátíð þar sem við fögnum íslenskri leikritun og skáldunum sem skrifa fyrir sviðið. Leikhópur Þjóðleikhússins flytur ný íslensk leikrit eftir höfunda sem eiga mikilvægt erindi við leiksviðið í formi æfðs leiklestrar. Höfundar Gula dregilsins 2026-27 eru þau Brynja Hjálmsdóttir, Ragnar Ísleifur Bragason og Sigurður Ámundason.
NÁNAR
Nýtt íslenskt verk á fjölum Þjóðleikhússins
Þjóðleikhúsið tekur reglulega á móti fjölda hugmynda og handrita á ólíkum vinnslustigum. Veki innsend hugmynd áhuga leikhússins er höfundum gjarnan boðið samtal við dramatúrga hússins. Í framhaldi af því er verkið tekið til nánari skoðunar.
Aðdragandi þess að nýtt íslenskt verk er tekið til sýninga í Þjóðleikhúsinu getur verið með ólíku móti. Leikhúsið kaupir tilbúið verk af höfundi eða ræður höfund til að skrifa fyrir leikhúsið.
Höfundur vinnur þá í samvinnu við leikhúsið að þróun leikverks út frá hugmynd og handritsdrögum sem hann hefur lagt fram. Sjá nánar í samningi Þjóðleikhússins og Rithöfundasambands Íslands.
Skil á hugmynd eða handriti
Höfundar eru hvattir til að senda leikhúsinu hugmynd, drög eða fullskrifuð verk til lestrar.
Hugmynd eða handritsdrögum skal fylgja handrit eða eitt eða fleiri atriði úr verkinu, ásamt stuttri lýsingu og ferilskrá. Gott er að lýsing á verkinu sé hnitmiðuð en að fram komi persónufjöldi, atburðarás og ætlunarverk höfundar.
Handrit, hugmyndir eða drög skulu send á netfangið
LEIKRITUN@LEIKHUSID.IS
Leikhúsið sendir staðfestingu á móttöku handrits, og svarar höfundi innan fjögurra mánaða í samræmi við samning Þjóðleikhússins og RSÍ.
Verkefnavalsnefnd
Verkefnavalsnefnd starfar við Þjóðleikhúsið, ásamt listrænni yfirstjórn hússins, en hlutverk hennar er að taka þátt í að finna og meta verkefni fyrir leikhúsið. Verkefnavalsnefnd tekur á hverju ári fjölda innlendra og erlendra leikrita og hugmynda að verkefnum til skoðunar. Auk nefndarinnar koma ýmsir aðilar að verkefnavali fyrir leikhúsið, listrænir stjórnendur og annað starfsfólk leikhússins og álitsgjafar utan hússins.
Listræn yfirstjórn: Magnús Geir Þórðarson þjóðleikhússtjóri, Melkorka Gunborg Briansdóttir listrænn ráðunautur og Melkorka Tekla Ólafsdóttir leiklistarráðunautur.
Fulltrúar í verkefnavalsnefnd: Ilmur Stefánsdóttir leikmyndahöfundur, Vala Fannell verkefnastjóri samfélagsmála.
Ráðgjafar verkefnavalsnefndar: Jónmundur Grétarsson leikari, Þorsteinn Sturla Gunnarsson leikstjóri og leikskáld og Eyja Sigríður Gunnlaugsdóttir, dramatúrg.
Meðal þeirra sem hafa komið að verkefnavali eða verið til ráðgjafar á undanförnum misserum eru Matthías Tryggvi Haraldsson dramatúrg, Hrafnhildur Hagalín dramatúrg, Jónsi Hannesson sviðshöfundur, Kolbrún Dögg Kristjánsdóttir sviðshöfundur, Siobhán Antoinette Henry leikari og sviðsmaður og Unnsteinn Manuel Stefánsson tónlistarmaður og fjölmiðlamaður.
Bókabúð
Í leikhúsbókabúð í forsalnum er að finna úrval spennandi bóka um leiklist og aðrar sem tengjast sýningum hússins með einum eða öðrum hætti. Leikhúsið hefur hafið útgáfu nýrra, íslenskra leikrita og þegar hafa leikritin Sjö ævintýri um skömm eftir Tyrfing Tyrfingsson og Heim eftir Hrafnhildi Hagalín komið út.
