Lára og Ljónsi – jólasaga
Hvað getur hafa orðið af Ljónsa?
Leiksýning byggð á geysivinsælum bókum Birgittu Haukdal um Láru og Ljónsa, yljaði ungum sem eldri áhorfendum um hjartað á aðventunni árin 2021 og 2022 og sýningarnar seldust upp á svipstundu. Aldursviðmið: 2ja til 6 ára.
Verkið gerist á aðventunni og jólasveinarnir eru farnir að tínast til byggða og gefa börnum í skóinn. En eina nóttina hverfur Ljónsi, uppáhalds mjúkdýrið hennar Láru sem, eins og flestir vita, er enginn venjulegur bangsi. Hvað getur hafa orðið af Ljónsa? Getur verið að hvarf hans tengist jólasveinunum á einhvern hátt?
Hér er á ferðinni krúttleg tæp klukkustund í góðum félagsskap þar sem leikhústöfrar svífa yfir leiksviðinu eins og snjókorn.
SJ, Fbl.
Myndbönd
Ævintýrin sem allir krakkar elska
Bækur Birgittu Haukdal um Láru og Ljónsa njóta ómældra vinsælda hjá íslenskum börnum, og nú birtast þessar ástsælu persónur í fyrsta sinn á leiksviði. Leikverkið hentar vel yngstu áhorfendunum og er tilvalin skemmtun í aðdraganda jólanna. Birgitta Haukdal semur tónlist sýningarinnar.
Fyrstu Láru-bækurnar komu út árið 2015, Lára lærir að hjóla og Lára fer í flugvél, og slógu eftirminnilega í gegn. Síðan þá hafa komið tvær nýjar sögubækur um þau Láru og Ljónsa á hverju ári, auk bendibókanna Lára og Ljónsi sem henta allra minnstu lesendunum. Krakkar eiga að geta samsamað sig við Láru, vini hennar og fjölskyldu. Enginn er fullkominn og Lára getur sannarlega verið óþekk eða gert ýmis mistök.
Lárubækurnar og jólasöngbók Birgittu eru til sölu í leikhúsinu. Aldursviðmið: 2ja til 6 ára
