Orð gegn orði (Prima Facie)
Eitthvað verður að breytast!
Tessa er ungur og metnaðarfullur lögmaður, hámenntuð og eitursnjöll, sem hefur tekist að klífa hratt upp metorðastigann. Hún vinnur hvert málið á fætur öðru, með framúrskarandi þekkingu sinni á lagabókstafnum, ver sakborninga af fimi og prófar vitni með úthugsuðum spurningum. Skyndilega verður ófyrirsjáanlegur atburður í einkalífi hennar til þess að allt sem virtist svo borðleggjandi sýnist ekki eins einfalt og skýrt og áður, og hún neyðist til að taka hugmyndir sínar og viðhorf til gagngerrar endurskoðunar.
Í verkinu er tekist á við ágengar spurningar um feðraveldið, réttarkerfið, kynferðisbrotamál, siðgæði, sekt og sönnunarbyrði. Hvaða vægi hafa tilfinningar og réttlætiskennd í flóknum málum, og hvenær er sekt nægilega sönnuð? Ebba Katrín Finnsdóttir leikur þennan magnaða verðlaunaeinleik.
6. sýning – umræður eftir sýningu.
Athugið að sýningin er ekki við hæfi barna.
Í sýningunni eru blikkandi ljós.
Kveikjuviðvörun (e. Trigger Warning): Sjá nánar um viðvaranir vegna umfjöllunarefnis leiksýninga og notkunar tæknibúnaðar hér.
„Þetta var leiksigur sem maður sér ekki oft.“
Hugrás, D.K.
Suzie Miller hlaut Olivier-verðlaunin fyrir leikritið árið 2023
Orð gegn orði (Prima Facie) er margverðlaunað, nýtt verk sem sló í gegn á West End og Broadway, eftir að hafa unnið til leikritunarverðlauna ástralska rithöfundasambandsins. Verkið hlaut Olivier-verðlaunin árið 2023, auk þess sem sýningin hlaut fjölda tilnefninga til Olivier-verðlaunanna og Tony-verðlaunanna.
Ebba Katrín Finnsdóttir leikur Tessu
Ebba Katrín Finnsdóttir útskrifaðist af leikarabraut Listaháskóla Íslands 2018. Í vetur leikur hún í Orð gegn orði (Prima Facie) og Ellen B. Hún lék hér annað titilhlutverkið í Rómeó og Júlíu og var einn af höfundum tónlistar í sýningunni, lék Uglu í Atómstöðinni, í Ást og upplýsingum, Meistaranum og Margarítu og Þínu eigin leikriti II-Tímaferðalagi.
Nánar
Listrænir stjórnendur
Sýningarréttur: Nordiska ApS og The Agency (London).
Titill á frummáli: Prima Facie.
„Árangurinn er líka leiksigur sem lengi verður í minnum hafður, það fór ekki á milli mála eftir viðtökurnar í gærkvöldi.“
„Ebba Katrín er ein besta – kannski besta – leikkona sinnar kynslóðar.“
TMM, S.A.
