Þórey Birgisdóttir útskrifaðist af leikarabraut Listaháskóla Íslands vorið 2018.

Í vetur leikur hún í Vlogginu, Kardemommubænum, Láru og Ljónsa, Ég get og Nashyrningunum í Þjóðleikhúsinu.

Þórey fór með hlutverk í söngleiknum Slá í gegn á lokaári sínu í skólanum og hefur síðan þá leikið í Kópavogskróniku, Meistaranum og Margarítu, Shakespeare verður ástfanginn, Jónsmessunæturdraumi og Ronju ræningjadóttur hjá Þjóðleikhúsinu. Hún sá jafnframt um sviðshreyfingar í Shakespeare verður ástfanginn og Þitt eigið leikrit II.

Áður en hún lauk námi tók hún þátt í Ævintýrum í Latabæ í Þjóðleikhúsinu, Mary Poppins og Galdrakarlinum í Oz í Borgarleikhúsinu. Auk þess hefur hún leikið og dansað með sjálfstæðum leikhópum, meðal annars í Ég býð mig fram, VIVID, Konubörnum, Dísu ljósálfi, Kæru vinir, 10 skref blindandi og Vorblótinu.

Hún lék í stuttmyndunum Thick Skin og Nýr dagur í Eyjafirði. Hún hefur einnig komið víða fram sem dansari, bæði á sviði og í sjónvarpi. Þórey fór með hlutverk Betty Lavender í páskaleikriti útvarpsleikhússins Ferðalög eftir Jón Gnarr.