Harrý og Heimir – Morð skulu standa

Harrý og Heimir gefa ekkert eftir – og slá í gegn í Kjallaranum!

Nýjasta sýningin um Harrý og Heimi sló sannarlega í gegn í Leikhúskjallaranum á síðasta leikári, með troðfullum sýningum. Ekki missa af sýningum haustsins!

Það var seint um kvöld. Afar seint um kvöld. Reyndar svo seint að það var orðið snemma morguns. Harrý Rögnvalds einkaspæjari sat á skrifstofu sinni ásamt Heimi Schnitzel, hundtryggum aðstoðarmanni sínum. (Voff voff voff). Þetta var reyndar ekki í fyrsta sinn sem Harrý og Heimir sátu saman með brakandi heilasellur.

„Getur verið að við verðum að leysa glæpamál í Þjóðleikhúskjallaranum allan næsta vetur?“ spurði Heimir.

„Það gæti hugsast, það fer eftir ýmsu,“ svaraði Harrý.

„Ertu ekki að meina að það gæti spögulerast?“

„Þegiðu, Heimir.“

„Alveg vissi ég að þú myndir segja þetta, Harrý,“ sagði Heimir.

Hinir ástsælu Harrý og Heimir snúa aftur, stútfullir af grunsemdum!

Harrý og Heimir eiga að baki fjölda sprenghlægilegra sakamálaleikrita í útvarpi, geysivinsælu leiksýninguna Með öðrum morðum og kvikmyndina Morð eru til alls fyrst. Nú er Leikhúskjallarinn, með alla sína reykmettuðu skugga og skúmaskot, orðinn vettvangur æsilegra rannsókna þeirra.

Leikarar, spuni og hugmyndavinna: Karl Ágúst Úlfsson, Sigurður Sigurjónsson, Örn Árnason. Handrit: Karl Ágúst Úlfsson. Leikstjórn: Þröstur Leó Gunnarsson.

Harrý og Heimir í samstarfi við Þjóðleikhúsið.