Don Pasquale
Ljúffengar laglínur og leiftrandi fjör
Sviðslistahópurinn Óður hefur sannarlega slegið í gegn í Kjallaranum með nýstárlegum og bráðskemmtilegum sýningum sínum á gamanóperunum Ástardrykknum og Don Pasquale. Hvort sem þú ert einlægur óperuunnandi eða hefur aldrei farið á óperusýningu getur þú sannarlega skemmt þér konunglega við hrífandi tónlist, sprell og fjör! Óður sýnir nokkrar sýningar á Don Pasquale í september og í mars mun hópurinn frumsýna glænýja sýningu á frönsku gamanóperunni Póst-Jón (Le postillon de Lonjumeau).
Don Pasquale
Don Pasquale, gamall forríkur piparsveinn á biðilsbuxunum. Ernesto, ungur og myndarlegur frændi hans og einkaerfingi. Hin glæsilega Norina, ung og efnalítil ekkja. Læknirinn og bragðarefurinn Malatesta setur af stað óborganlega atburðarás í þessari ærslafullu gamanóperu sem er full af ljúffengum laglínum og leiftrandi fjöri.
Nánd við áhorfendur og potað í óskrifaðar reglur
Úr gagnrýni um Ástardrykkinn:
“Þetta er vægast sagt frábærlega heppnað hjá Óði. Það má ekki á milli sjá hvert þeirra nýtur sín best. […] Það er afslöppuð en orkurík leikgleði í öllum framgangi flytjendanna.” ÞT – MBL
“Þetta unga fólk syngur svo vel að ekki þarf að kvíða óperuflutningi á Íslandi í framtíðinni. […] [Ö]ll fjögur eru fínir leikarar sem tjá allar þessar ruglingslegu tilfinningar eins og þau skilji þær djúpum skilningi.” SA – TMM
“Fjörug og full af lífi, og góð skemmtun líka fyrir fólk sem ekki þekkir vel til óperumenningar.”
SB – RÚV
Don Pasquale er samstarfsverkefni Óðs og Þjóðleikhússins, og er styrkt af Sviðslistasjóði og Launasjóði sviðslistafólks.
