Þjóðleikhúsið nýtir tækifærið og heldur námskeið fyrir leikstjóra nú þegar sýningum er frestað
Þjóðleikhúsið efnir til tveggja daga master class námskeiðs með Yaël Farber fyrir leikstjóra nú í byrjun nóvember. Þar gefst völdum hópi leikstjóra einstakt tækifæri til að kynnast og læra af þessum margverðlaunaða leikstjóra sem leikstýrt hefur víða um heim og er stödd hér á landi vegna æfinga á Framúrskarandi vinkonu, en frumsýningu hefur nú verið frestað þar til í mars.
Yaël Farber leikstýrir Framúrskarandi vinkonu í Þjóðleikhúsinu á þessu leikári. Hún hefur dvalið hér í haust við æfingar, sem hafa gengið afar vel og stór hópur leikara við Þjóðleikhúsið hefur notið þess að takast á við þetta magnaða leikverk undir stjórn Farber.
Vegna kórónuverufaraldursins hefur Þjóðleikhúsið þurft að gera hlé á æfingunum og fresta frumsýningu til 6. mars, og því var ákveðið að nota tímann meðan þessi framúrskarandi leikstjóri er á landinu til að gefa fleiri íslenskum leikhúslistamönnum tækifæri til að læra af henni. Þessar aðstæður útskýra stuttan fyrirvara á námskeiðinu, en námskeiðið verður haldið strax í næstu viku. Með námskeiðinu vill Þjóðleikhúsið leggja sitt af mörkum til að efla íslenska leikstjóra og íslenskt leikhúslíf.
Auk leikstjóra úr Þjóðleikhúsinu verður sex leikstjórum úr hópi umsækjenda boðin þátttaka í námskeiðinu sér að kostnaðarlausu. Námskeiðið fer fram í Þjóðleikhúsinu þriðjudaginn 3. og miðvikudaginn 4. nóvember kl. 10.00-16.00. Að sjálfsögðu verður gætt að sóttvörnum og nándartakmörkunum.
Áhugasamir sendi póst á masterclass@leikhusid.is. Umsóknarfrestur er til og með fimmtud. 29. október.
Með umsókn skal fylgja stutt ferilskrá á einni síðu, á ensku.
Ekki skal senda myndir eða myndbönd með umsókn en umsækjandi er beðinn að svara þessum spurningum í stuttu máli, á ensku:
- Why do you want take part in this master class and what do you expect from it (10-15 línur):
- How would you define yourself and your interests as a director (10-15 línur):
Nánari upplýsingar um Yaël Farber er að finna HÉR.
Einnig má lesa viðtal við hana HÉR.
