Athyglisverðustu áhugaleiksýningar ársins eru tvær
Þjóðleikhúsið hefur staðið fyrir vali á athyglisverðustu áhugaleiksýningu leikársins í hartnær 30 ár, eða 27 sinnum, eins og sjá má á yfirliti hér að neðan. Þar sem valið féll niður síðustu tvö ár í röð vegna Covid-faraldursins var ákveðið að velja tvær leiksýningar að þessu sinni. Sýningarnar sum urðu fyrir valinu eru Fyrsti kossinn frá Leikfélagi Keflavíkur og Pétur Pan frá Leikflokki Húnaþings vestra. Sýningarnar verða báðar sýndar í Þjóðleikhúsinu í júní.
Til heiðurs Rúnari Júlíussyni
Fyrsti kossinn er eftir Brynju Ýr Júlíusdóttur og Guðlaug Ómar Guðmundsson í leikstjórn Karls Ágústs Úlfssonar frá verður sýnd í Kassanum í Þjóðleikhúsinu 9. og 10.júní. Sýningin var sett upp haustið 2021 hjá Leikfélagi Keflavíkur til heiðurs Rúnari Júlíussyni og sló þar sýningamet. Höfundar eru þau Brynja Ýr Júlíusdóttir og Guðlaugur Ómar Guðmundsson. Karl Ágúst Úlfsson leikstýrir og Brynhildur Karlsdóttir danshöfundur. Sýningin fjallar um líf og ástir meðlima hljómsveitarinnar Grip sem eru að æfa sig fyrir stærstu hljómsveitarkeppni landsins, Hljómaflæði. Tónlist sýningarinnar er öll úr katalóg Rúnars Júlíussonar.
Lifandi tónlist, söngur og dans einkenna sýninguna.
Eitt mesta ævintýri sem nokkru sinni hefur verið leikið á sviði
Pétur Pan er eftir J. M. Barry í leikstjórn Gretu Clough. Boðið verður upp á tvær sýningar á í Kassanum 12. júní. Þegar leiðtogi týndu barnanna, Pétur Pan, týnir skugga sínum í heimsókn til Lundúna, hjálpar hin ákveðna Vanda honum að festa skuggan aftur við sig. Í staðinn er henni boðið til Hvergilands.
Árið 1904 frumsýndi JM Barrie eitt mesta ævintýri sem nokkru sinni hefur verið leikið á sviði. Uppfullt af hafmeyjum, sjóræningjum og álfum, ættbálki týndra barna og krókódílum, stútfullt af töfrum og tiltækjum. Pétur Pan er fyndin og áhrifamikil sviðsetning á sögu sem er elskuð og dáð. Verkið hentar áhorfendum á öllum aldri.
Við fylgjumst með ævintýrum Péturs Pans og uppátækjasömu álfavinkonu hans, Skellibjöllu, þegar þau heimsækja börn í Lundúnum kvöld eitt, eftir að skyggja tekur. Með hjálp örlítils álfaryks hefja þau töfrandi ferð meðal stjarnanna sem ekkert þeirra mun nokkurn tíma gleyma. Allt frá tifandi krókódílum til grimma stríðsmanna, brjálaðra sjóræningja og sjálfs illmennisins Króks kafteins, þetta skemmtilega og sígilda ævintýri mun gleðja alla aldurshópa. Pétur Pan er fullkomin sýning fyrir barnið eilífa í okkur öllum!
Kaupa miða á Pétur Pan
Áhugasýning árins frá upphafi
Athyglisverðasta áhugaleiksýning ársin ssýnd í Þjóðleikhúsinu
- 1993-1994
Leikfélag Hornafjarðar
Djöflaeyjan eftir Einar Kárason
Leikstjórn: Guðjón Sigvaldason
- 1994-1995
Freyvangsleikhúsið (Eyjafirði)
Kvennaskólaævintýrið eftir Böðvar Guðmundsson
Leikstjórn: Helga E. Jónsdóttir
- 1995-1996
Leikfélag Sauðárkróks
Sumarið fyrir stríð eftir Jón Ormar Ormsson
Leikstjórn: Edda V. Guðmundsdóttir
- 1996-1997
Leikfélag Selfoss
Smáborgarabrúðkaup eftir Bertolt Brecht
Leikstjórn: Viðar Eggertsson
- 1997-1998
Freyvangsleikhúsið (Eyjafirði)
Velkomin í Villta vestrið eftir Ingibjörgu Hjartardóttur
Leikstjórn: Helga E. Jónsdóttir
- 1998-1999
Leikfélag Keflavíkur
Stæltu stóðhestarnir eftir Stephen Sinclair og Anthony McCarten
Leikstjórn: Andrés Sigurvinsson
- 1999-2000
Ungmennafélagið Efling, Leiklistarhópur (Reykjadal)
Síldin kemur og síldin fer eftir Iðunni og Kristínu Steinsdætur
Leikstjórn: Arnór Benónýsson
- 2000-2001
Stúdentaleikhúsið (Reykjavík)
Ungir menn á uppleið eftir Sigríði Láru Sigurjónsdóttur
Leikstjórn: Bergur Þór Ingólfsson
- 2001-2002
Leikfélag Kópavogs
Grimmsævintýri í leikgerð leikstjóra og leikhóps
Leikstjórn: Ágústa Skúladóttir
- 2002-2003
Litli leikklúbburinn og Tónlistarskóli Ísafjarðar
Söngvaseiður eftir Rodgers og Hammerstein
Leikstjórn: Þórhildur Þorleifsdóttir
- 2003-2004
Ungmennafélagið Efling, leikdeild (Reykjadal)
Landsmótið eftir Jóhannes Sigurjónsson og Hörð Þór Benónýsson
Leikstjórn: Arnór Benónýsson
- 2004-2005
Stúdentaleikhúsið
Þú veist hvernig þetta er eftir hópinn og leikstjórann
Leikstjórn: Jón Páll Eyjólfsson
- 2005-2006
Leikfélag Selfoss
Þuríður og Kambsránið eftir Sigurgeir Hilmar Friðþjófsson.
Leikstjórn: Jón Stefán Kristjánsson.
- 2006-2007
Leikfélag Fljótsdalshéraðs
Listin að lifa eftir Sigríði Láru Sigurjónsdóttur.
Leikstjórn: Oddur Bjarni Þorkelsson.
- 2007-2008
Halaleikhópurinn
Gaukshreiðrið eftir Dale Wasserman / Ken Kesey
Leikstjórn: Guðjón Sigvaldason
- 2008-2009
Freyvangsleikhúsið
Vínland eftir Helga Þórsson
Leikstjórn: Ólafur Jens Sigurðsson
- 2009-2010
Hugleikur
Rokk. Höfundar: Ásta Gísladóttir, Júlía Hannam, Sigurður H. Pálsson og Þórarinn Stefánsson
Leikstjórn: Hulda B. Hákonardóttir og Þorgeir Tryggvason
- 2010-2011
Freyvangsleikhúsið
Góði dátinn Svejk, leikgerð Colin Teevan eftir sögu Jaroslav Hasek
Leikstjórn: Þór Tulinius
- 2011-2012
Leikfélag Kópavogs
Hringurinn eftir Hrefnu Friðriksdóttur
Leikstjórn: Hörður Sigurðsson
- 2012-2013
Leikfélag Ólafsfjarðar og Leikfélag Siglufjarðar
Stöngin inn eftir Guðmund Ólafsson
Leikstjórn: Guðmundur Ólafsson
- 2013-2014
Hugleikur
Stund milli stríða eftir Þórunni Guðmundsdóttur
Leikstjórn: Jón St. Kristjánsson
- 2014-2015
Leikfélag Mosfellssveitar
Ronja ræningjadóttir eftir Astrid Lindgren
Leikstjórn: Agnes Wild
- 2015-2016
Leikfélag Hafnarfjarðar
Ekkert að óttast, unnið í höfundasmiðju
Leikstjórn: Ólafur Þórðarson
- 2016-2017
Leikfélag Hveragerðis
Naktir í náttúrunni, byggt á The Full Monty
Leikgerð og leikstjórn: Jón Gunnar Þórðarson
- 2017-2018
Leikfélag Keflavíkur
Mystery Boy eftir Smára Guðmundsson
Leikstjórn: Jóel Sæmundsson
- 2018-2019
Leikflokkur Húnaþings vestra
Hárið eftir Gerome Ragni og James Rado
Leikstjórn: Sigurður Líndal Þórisson
2019-2020
Valið gat ekki farið fram vegna Covid-faraldursins.
2020-2021
Valið gat ekki farið fram vegna Covid-faraldursins.
- 2021-2022
Tvær sýningar voru valdar, önnur fyrir börn og hin fyrir fullorðna, þar sem valið hafði fallið niður vegna Covid tvö ár í röð:
Leikfélag Keflavíkur
Fyrsti kossinn eftir Brynju Ýr Júlíusdóttur og Guðlaug Ómar Guðmundsson
Leikstjórn: Karl Ágúst Úlfsson
Leikflokkur Húnaþings vestra
Pétur Pan eftir J. M. Barry
Leikstjórn: Greta Clough
