/
Starfsfólk Þjóðleikhússins

Valgerður Guðnadóttir

Leikari
/

Valgerður Guðnadóttir

Valgerður Guðnadóttir útskrifaðist frá The Guildhall School of Music and Drama í London árið 2000. Áður hafði hún lokið 8. stigi í söng með láði frá Söngskólanum í Reykjavík.

Valgerður leikur í söngleiknum Sem á himni, Framúrskarandi vinkonu og Leitinni að jólunum í Þjóðleikhúsinu í vetur.

Valgerður hóf feril sinn sem María Magdalena í Jesus Christ Superstar í Verzlunarskólanum. Í kjölfarið fór hún með hlutverk Dala Völu í sjónvarpsleikritinu Þið munið hann Jörund í leikstjórn Óskars Jónassonar og Maríu í West Side Story í Þjóðleikhúsinu 18 ára gömul. Síðan þá hefur hún leikið og sungið á ólíkum vettvangi, t.d. hjá Þjóðleikhúsinu, Borgarleikhúsinu, Leikfélagi Akureyrar, Íslensku óperunni og Gaflaraleikhúsinu.

Valgerður lék hlutverk Mömmu klikk í samnefndu leikriti eftir bók Gunnars Helgasonar og hlaut fyrir það tilnefningu til Grímunnar. Hún lék hlutverk Maríu í Söngvaseiði í Borgarleikhúsinu en fyrir það hlutverk hlaut hún Grímuna sem söngvari ársins árið 2009. Á meðal annarra hlutverka eru Janet í Rocky Horror, Christine Dae í The Phantom of the Opera, Fantine í Vesalingunum, Linda í Gauragangi, Greta Garbo í Halldóri í Hollywood, Papagena í Töfraflautunni, Mercedes í Carmen, Barbarina í Brúðkaupi Fígarós og Berta í Rakaranum frá Sevilla. Hún hefur leikið í fjölda barnaleikrita eins og Leitinni að jólunum, Benedikt búálfi, Ávaxtakörfunni og Hafinu bláa og tekið þátt í frumflutningi á verkum eins og barnasöngleiknum Björt í Sumarhúsi eftir Þórarin Eldjárn og Elínu Gunnlaugsdóttur. Hún lék jafnframt einleik upp úr verkinu vítt og breitt um landið á vegum List fyrir alla. Valgerður hefur þrisvar verið tilnenfd til Grímunnar og tvisvar til Íslensku tónlistarverðlaunanna.

Valgerður hefur komið víða fram sem einsöngvari hér heima og erlendis og haldið fjölda tónleika. Hún hefur margsinnis sungið einsöng með Sinfóníuhljómsveit Íslands, t.d. á Vínar- og jólatónleikum og með Sinfonia Nord í hlutverki Völvunnar í Völuspá eftir Þorvald Bjarna Þorvaldsson. Hún hefur léð Disney persónum eins og Pocahontas og Litlu hafmeyjunni rödd sína ásamt fleiri karakterum og sungið inn á fjölda hljómplatna og geisladiska.

/

Sýningar

Opnunartími miðasölu

Miðasala Þjóðleikhússins er opin frá kl. 14 – 18 og til kl. 20.00 á sýningarkvöldum.

Heimilisfang
Hverfisgata 19, 101 reykjavík
Sjá á korti
Sími