Þjóðleikhúsið frumsýnir Eddu

Þjóðleikhúsið frumsýnir Eddu, á Stóra sviðinu á annan dag jóla, þriðjudaginn 26. desember kl. 20.00. Edda er sviðsetning Þorleifs Arnar og leikhópsins á hugmyndaheimi norrænnar goðafræði eins og hún birtist okkur í Snorra-Eddu og Völuspá. Hugmyndaauðgi, sprengikraftur og sterk, myndræn sýn eru aðalsmerki sýninga Þorleifs og hér er hann sannarlega á heimavelli.

Átök guða, manna og annarra afla sem stjórna heiminum, sköpun heimsins og endalok hans, birtast okkur hér í stórsýningu þar sem í brennidepli er samband okkar við náttúruna. Sýningin er kraftmikil og efnið er sett fram á nýstárlegan, frjóan og ögrandi hátt sem hentar bæði þeim sem þekkja goðafræðina, og hinum sem hafa minni þekkingu á viðfangsefninu en vilja byrja að kynnast þessum mögnuðu frásögnum sem hafa fylgt okkur frá upphafi Íslandsbyggðar.

Þorleifur fylgir nú eftir öðrum kynngimögnuðum sýningum svo sem Rómeó og Júlíu, Njálu og Englum alheimsins, og heldur hann áfram að víkka út möguleika leikhússins með stórum hópi leikara og annarra leikhúslistamanna.

Leikarar
Almar Blær Sigurjónsson, Arnar Jónsson, Atli Rafn Sigurðarson, Ernesto Camilo Aldazábal Valdes, Guðrún S.Gísladóttir, Hallgrímur Ólafsson, Kjartan Darri Kristjánsson, María Thelma Smáradóttir, Ólafía Hrönn Jónsdóttir, Pálmi Gestsson, Sigurbjartur Sturla Atlason, Vigdís Hrefna Pálsdóttir, Þröstur Leó Gunnarsson, Þuríður Blær Jóhannsdóttir og Egill Andrason tónlistarmaður.

Leikstjórn
Þorleifur Örn Arnarsson

Höfundar
Harpa Rún Kristjánsdóttir, Jón Magnús Arnarsson, Þorleifur Örn Arnarsson

Leikmynd
Vytautas Narbutas

Búningar
Karen Briem

Sjálfbærnihönnuður búninga
Andri Unnarson

Dramatúrg
Matthías Tryggvi Haraldsson

Tónlist
Egill Andrason, Salka Valsdóttir

Tónlistarstjórn
Salka Valsdóttir

Lýsing
Ásta Jónína Arnardóttir

Sviðshreyfingar
Ernesto Camilo Aldazábal Valdés

Hljóðhönnun
Aron Þór Arnarsson, Salka Valsdóttir, Egill Andrason