Nýtt leikár Þjóðleikhússins hefst fyrr og af meiri krafti en áður og engar fleiri sýningar á þessu leikári
Nýtt leikár Þjóðleikhússins hefst 29. ágúst með frumsýningu á Kardemommubænum – en ákveðið hefur verið að engar sýningar verði það sem eftir lifir þessa leikárs vegna samkomubanns. Næsta leikár hefst á hinn bóginn fyrr og af meiri krafti en venja er. Hver nýja sýningin mun reka aðra í haust og ljóst er að það verður mikið líf í Þjóðleikhúsinu þegar nýtt og spennandi leikár fer af stað.
Þegar hefur verið tilkynnt að í lok september verði Framúrskarandi vinkona frumsýnd en þar er á ferð viðamikil uppfærsla sem byggir á hinum geysivinsælu Napólí-sögum Elenu Ferrante og verður í leikstjórn heimsþekkts leikstjóra, Yael Farber. Einnig verður Kópavogskrónika frumsýnd snemma í haust, Þitt eigið leikrit mun halda áfram göngu sinni og fleiri spennandi nýjar sýningar verða kynntar innan skamms. Þegar er uppselt á hátt í 50 sýningar á Kardemommubænum og í næstu viku munu gestir sem áttu bókaða miða í vor á þá sýningu og aðrar fá tilkynningu um nýjar sýningardagsetningar haustsins.
