Yerma er jólasýning Þjóðleikhússins
Jólasýning Þjóðleikhússins í ár er Yerma. Leiftrandi, áleitið og átakanlegt nútímaverk sem hefur slegið rækilega í gegn. Leikritið er byggt á samnefndu meistaraverki Federico García Lorca frá árinu 1934 sem gerist í spænsku sveitasamfélagi. Höfundur leikritsins, hinn heimsþekkti leikhúsmaður Simon Stone, flytur atburðarásina inn í borgarsamfélag samtímans og frumkraftarnir í verkinu birtast okkur í nýju ljósi.
Á myndina vantar Ólafíu Hrönn Jónsdóttur, leikkonu
Leikstjórinn Gísli Örn Garðarsson leiðir hér saman einstaklega sterkan hóp leikara í fádæma kraftmiklu verki. Það er óhætt að lofa magnaðri kvöldstund.
Leikarar: Nína Dögg Filuppusdóttir, Björn Thors, Ilmur Kristjánsdóttir, Ólafía Hrönn Jónsdóttir, Guðjón Davíð Karlsson og Vala Kristín Eiríksdóttir.
Yerma verður frumsýnd á annan dag jóla á Stóra sviðinu.
Hún er kona í blóma lífsins, sjálfsörugg og opinská, eldklár, ákveðin og óhefluð. Henni gengur vel í starfi sínu og er að flytja inn í nýtt hús með manninum sem hún elskar. Það er bara eitt sem vantar – barn. Kærastinn er til í það, og það er ekki eftir neinu að bíða! En það sem virðist svo eðlilegur hluti af lífinu reynist ekki sjálfsagt. Eftir því sem biðin lengist virðist einhver ofursterkur kraftur ná sífellt öflugri tökum á henni. Löngun verður að þrá, þráin að þráhyggju og smám saman missir hún tökin. Hvernig bregst kona við ef lífið verður ekki við hennar heitustu bón?
Höfundur
Simon Stone
Leikstjórn
Gísli Örn Garðarsson
Leikmynd
Börkur Jónsson
Búningar
Þórhildur Sunna Jóhannsdóttir
Lýsing
Björn Bergsteinn Guðmundsson
Tónlist
Gulli Briem
Hljóðhönnun
Brett Smith
Þýðing
Júlía Margrét Einarsdóttir
Sýningarstjórn
Elín Smáradóttir
Framleiðslustjórn
Máni Huginsson
Starfsnemi (LHÍ)
Hafsteinn Níelsson
Leikmunir, yfirumsjón
Ásta S. Jónsdóttir
