Nýtt lag úr söngleiknum Ormstungu er komið út

Nýja árið er sprengt inn með látum í Þjóðleikhúsinu. Nýtt lag úr stórsöngleiknum Ormstungu er komið á tónlistarveitur. Lagið Kveðast á er flutt af þeim Jakobi van Oosterhout og Kristni Óla. S. Haraldssyni, en þeir fara með hlutverk Gunnlaugs Ormsstungu og Hrafns Önundarsonar í sýningunni. Höfundar söngleiksins er þeir Hafsteinn Níelsson og Ólíver Þorsteinsson en Hafsteinn semur alla tónlist verksins auk þess sem Jóhannes Damian Petreksson kom einnig að þróun tónlistarinnar á seinni stigum verksins.

Ormstunga er glænýr og ferskur íslenskur söngleikur byggður á Gunnlaugs sögu ormstungu, sígildri sögu sem er í senn spennandi, fyndin og hjartnæm. Gunnlaugur Illugason, Hrafn Önundarson og Helga hin fagra Þorsteinsdóttir mynda einn frægasta ástarþríhyrning fornbókmenntanna. Of lengi hafa örlögin hrjáð þau en nú fyrir framan áhorfendur fá þau loksins að gera upp sín mál. Gísli Örn er þekktur fyrir töfrandi sýningar og hér leiðir hann einstakan leikhóp en alls taka um 25 flytjendur þátt í sýningunni, leikarar og tónlistarfólk.

Verkið er skrifað í anda hins heimsfræga stórsöngleiks Hamilton, sem ruddi brautina fyrir kraftmikinn samruna sögulegra atburða og krassandi tónlistar.

Ormstunga er söngleikur fyrir unga sem aldna, með grípandi og fjölbreyttri tónlist.