Ólafur Egill Egilsson útskrifaðist úr leiklistardeild LHÍ árið 2002. Hann hefur starfað sem leikari, handritshöfundur, leikskáld og leikstjóri í fjölda verkefna í leikhúsi, sjónvarpi og kvikmyndum. Hann leikstýrir í vetur opnunarviðburði Óperunnar, Undir sömu stjörnu, og skrifar jafnframt handrit. Leikstjórnarverkefni hans í Þjóðleikhúsinu eru Ásta, sem hann skrifaði handrit fyrir, Nokkur augnablik um nótt og Ör (eða Maðurinn er eina dýrið sem grætur), auk þess sem hann hefur leikið þar í fjölmörgum sýningum. Hann gerði leikgerð af Karitas og Sjálfstæðu fólki fyrir Þjóðleikhúsið. Í Borgarleikhúsinu samdi hann og leikstýrði hinum geysivinsælu sýningum Þetta er Laddi og Níu líf, auk þess sem hann leikstýrði Hystory, Brot úr hjónabandi, Kartöfluætunum og Tvískinnungi. Hann skrifaði jafnframt handritið að Ellý ásamt Gísla Erni Garðarssyni og gerði leikgerðir af Fólkinu í kjallaranum og Svari við bréfi Helgu. Meðal kvikmynda- og sjónvarshandrita sem hann hefur unnið að eru Ófærð, Katla og Eiðurinn. Hann skrifaði einnig ásamt Benedikt Erlingssyni sjónvarpsseríuna Dönsku konuna og handrit kvikmyndarinnar Kona fer í stríð.