Spennandi leikhúsnámskeið á vormisseri

Þjóðleikhúsið og Endurmenntun standa fyrir tveimur skemmtilegum leikhúsnámskeiðum á vormisseri. Annars vegar um Draumaþjófinn, fjölskyldusöngleikinn sem fer á fjalirnar í mars og hins vegar á að endurtaka vel heppnað námskeið um Þjóðleikhúsið sem haldið var fyrr í haust.

Draumaþjófsnámskeiðið er ætlað börnum og fullorðnum en börn þurfa að vera í fylgd fullorðinna. Á námskeiðinu koma þátttakendur í heimsókn í leikhúsið. Gunnar Helgason, höfundur bókarinnar sem leikritið er byggt á, og Björk Jakobsdóttir, höfundur leikgerðarinnar, segja frá verkinu og því hvernig leiksýning byggð á bók verður til. Farið verður í könnunarleiðangur um ævintýralega leikmyndina á Stóra sviðinu í fylgd Ilmar Stefánsdóttur leikmyndahöfundar. Eftir stutt hádegishlé hefst svo leiksýningin sjálf.

Þjóðleikhúsið á  bak við tjöldin er skemmtilegt og fræðandi námskeið um Þjóðleikhúsið okkar allra, þar sem þátttakendur kynnast Þjóðleikhúsbyggingunni í sögulegu samhengi, fara í skoðunarferð, öðlast innsýn í vinnuna baksviðs og kynnast því hvernig leikhúsgaldurinn verður til. Sambærilegt námskeið var haldið á liðnu hausti og þóttist heppnast einkar vel.