Í bókabúðinni má finna tilvaldar tækifærisgjafir og jólagjafir fyrir leikhúsunnendur
Í leikhúsbókabúð Þjóðleikhússins eru á boðstólum leikhúsbækur af öllu tagi á kostakjörum. Þar má finna leikrit og leikritasöfn, bækur um leikhús og leikhúsfólk, fræðirit um fagið og skáldverk sem tengjast leiksýningum Þjóðleikhússins. Þar er einnig boðið upp á eigin útgáfu leikhússins á völdum nýjum leikritum og þýðingum. Í versluninni er auk þess fáanlegur ýmiskonar varningur sem tengist sýningum hússins, geisladiskar og mynddiskar.
Leikritaútgáfa
Þjóðleikhúsið hefur hafið leikritaútgáfu með það að markmiði að efla leikritaútgáfu á íslensku. Leikritin eru til sölu í Leikhúsbókabúð Þjóðleikhússins.
Fyrsta leikritið í ritröðinni var Sjö ævintýri um skömm eftir Tyrfing Tyrfingsson og annað verkið var Heim eftir Hrafnhildi Hagalín.
Opnunartími
Leikhúsbókabúðin er opin á opnunartíma miðasölu leikhússins og á sýningarkvöldum.
Í bókabúðinni má finna tilvaldar tækifærisgjafir og jólagjafir fyrir leikhúsunnendur – og í leiðinni er hægt að festa kaup á okkar vinsælu miðum eða gjafakort á fjölbreytt úrval sýninga Þjóðleikhússins.
Við munum halda áfram að þróa bókabúðina okkar og bæta við nýjum titlum.
Ef þú vilt gera tillögur að bókum sem þú myndir vilja sjá á boðstólum í bókabúðinni, þá máttu gjarnan senda okkur línu á midasala@leikhusid.is.
Heim eftir Hrafnhildi Hagalín
Heim er spennuþrungið og launfyndið fjölskyldudrama, beint úr íslenskum samtíma, um það sem kraumar undir niðri, það sem ekki er sagt, en einnig það sem hefði betur verið látið ósagt. Hrafnhildur Hagalín er eitt okkar virtasta leikskáld, en meðal fyrri verka hennar eru Ég er meistarinn, Hægan Elektra og Sek.
Um sýningunaMóðirin er nýkomin heim eftir dvöl á heilsuhæli erlendis. Glæsileg veisla er haldin til að fagna heimkomunni. Faðirinn hefur alla þræði fjölskyldunnar í hendi sér – eftir því sem hann best veit – og dóttirin og sonurinn stíga dans á hárfínni línu sem þeim er ætlað að feta sig eftir. En eitthvað er ekki eins og það á að vera. Og ástandið er eldfimt. Voveiflegur atburður varpar skugga yfir fjölskylduna og teygir anga sína langt aftur. Þegar nágrannahjónin Elsa og Ellert banka upp á með öll sín vandamál kárnar gamanið og framundan er löng nótt.
Gráglettið fjölskyldudrama beint úr íslenskum samtíma um það sem kraumar undir niðri, það sem ekki er sagt, en einnig það sem hefði betur verið látið ósagt. Hrafnhildur Hagalín er eitt okkar virtasta leikskáld, en meðal fyrri verka hennar eru Ég er meistarinn, Hægan Elektra og Sek.
Sjö ævintýri um skömm eftir Tyrfing Tyrfingsson
Sýningin hlaut frábærar viðtökur, var tilnefnd til tólf Grímuverðlauna og hlaut verðlaunin fyrir leikrit ársins, leikstjórn, leikara í aðalhlutverki, leikmynd, búninga og lýsingu. Þetta nýja verk eftir Tyrfing Tyrfingsson kom áhorfendum skemmtilega á óvart, með sínum galgopalega húmor, frumleika og hlýju.
Hér er boðið upp á farsakennd ævintýri, byggð á sönnum atburðum, þar sem við fylgjum eftir ferðalagi skammarinnar í íslenskri fjölskyldu frá kanamellum í Flórída að Lúkasarmálinu á Akureyri og skoðum allt þar á milli!
Um sýningunaÓsvífinn kabarett með kanamellum og lögreglustjóranum á höfuðborgarsvæðinu.
Agla ryðst inn á stofu geðlæknis og krefst þess að hann skrifi upp á lyf sem nái að svæfa hana í þrjá sólarhringa. Geðlæknirinn vill ekki verða við þessari ósk Öglu en segir henni hinsvegar frá kenningu sinni um að sjö ævintýri um skömm liggi að baki allri geðveiki. Agla neyðist til að rekja sig í gegnum þessi ævintýri sem stjórna lífi hennar ef hún vill eiga einhvern möguleika á bata.
Kópavogsbúinn Tyrfingur Tyrfingsson hefur slegið í gegn hér heima og vakið mikla athygli erlendis. Þetta nýja leikrit Tyrfings er sjöunda verk hans sem er sviðsett í íslensku leikhúsi, en hið fyrsta sem sýnt er í Þjóðleikhúsinu. Tyrfingur hlaut Grímuna fyrir leikrit ársins 2020 og 2022.
