Una Torfadóttir er ásamt Unni Ösp Stefánsdóttur höfundur söngleiksins Stormur sem Þjóðleikhúsið sýnir á Stóra sviðinu. Una er jafnframt höfundur laga í söngleiknum og höfundur tónlistar ásamt Hafsteini Þráinssyni, auk þess sem hún leikur í sýningunni.

Una Torfadóttir lauk stúdentsprófi af fornmálabraut Menntaskólans í Reykjavík árið 2019, en þar átti Herranótt, leikfélag skólans, hug hennar allan. Síðan þá hefur hún prófað sviðshöfundabraut Listaháskóla Íslands og klæðskurðarnám í Tækniskólanum, og hefur síðustu ár starfað sem tónlistarkona. Lög Unu hafa notið mikillar velgengni og unnið til verðlauna. Árið 2023 var Una útnefnd söngvari ársins á íslensku tónlistarverðlaununum og fyrsta plata hennar, Flækt og týnd og einmana, hlaut Kraumsverðlaunin. Morgunblaðið útnefndi plötuna Sundurlaus samtöl poppplötu ársins 2024.