Finna má margvíslegan fróðleik um Halldór Laxness á vefsíðu Gljúfrasteins, sjá hér.
Tengsl Halldórs Laxness og Þjóðleikhússins voru alla tíð mikil. Halldór sat í þjóðleikhúsráði frá upphafi starfsemi þess, árið 1948, og allt til ársins 1969. Ein af þremur opnunarsýningum Þjóðleikhússins vorið 1950 var leikgerð skáldsögunnar Íslandsklukkunnar sem skáldið samdi í samvinnu við leikstjóra verksins, Lárus Pálsson, og í áranna rás hafa leikrit Halldórs og leikgerðir af skáldsögum hans oft verið á fjölum leikhússins.
Sýningar á leikritum Halldórs Laxness í Þjóðleikhúsinu:
1954 Silfurtúnglið. Leikstjórn: Lárus Pálsson.
1961 Strompleikurinn. Leikstjórn: Gunnar Eyjólfsson.
1966 Prjónastofan Sólin. Leikstjórn: Baldvin Halldórsson.
1975 Silfurtúnglið. Leikstjórn: Bríet Héðinsdóttir og Sveinn Einarsson.
1992 Straumrof. Sviðsettur leiklestur. Leikstjórn: Þórhallur Sigurðsson.
1992 Strompleikurinn. Sviðsettur leiklestur. Leikstjórn: Guðjón Pedersen.
1992 Prjónastofan Sólin. Sviðsettur leiklestur. Leikstjórn: Þórhildur Þorleifsdóttir.
2002 Strompleikurinn. Leikstjórn: Kristín Jóhannesdóttir.
Sýningar á leikgerðum byggðum á skáldsögum Halldórs Laxness í Þjóðleikhúsinu:
1950 Íslandsklukkan. Leikgerð: Halldór Laxness í samvinnu við Lárus Pálsson leikstjóra.
1956 Íslandsklukkan, fyrrnefnd uppfærsla sýnd að nýju í tilefni Nóbelsverðlaunanna.
1968 Íslandsklukkan. Leikstjórn: Baldvin Halldórsson.
1972 Sjálfstætt fólk. Leikgerð og leikstjórn: Baldvin Halldórsson.
1981 Hús skáldsins (Heimsljós). Leikgerð: Sveinn Einarsson. Leikstjórn: Eyvindur Erlendsson.
1985 Íslandsklukkan. Leikgerð og leikstjórn: Sveinn Einarsson.
1990 Úr myndabók Jónasar Hallgrímssonar. Leikgerð: Halldór Laxness. Leikstjórn: Guðrún Þ. Stephensen.
1992 Veiðitúr í óbygðum. Sviðsettur leiklestur á smásögu. Leikstjórn: Guðjón Pederson.
1998 Rhodymenia Palmata, ópera eftir Hjálmar H. Ragnarsson byggð samnefndum kvæðabálki Halldórs Laxness. Gestaleikur frá Frú Emilíu. Leikstjórn: Guðjón Pedersen.
1999 Bjartur – Landnámsmaður Íslands (Sjálfstætt fólk). Leikgerð: Kjartan Ragnarsson og Sigríður Margrét Guðmundsdóttir. Leikstjórn: Kjartan Ragnarsson.
1999 Ásta Sóllilja – Lífsblómið (Sjálfstætt fólk). Leikgerð: Kjartan Ragnarsson og Sigríður Margrét Guðmundsdóttir. Leikstjórn: Kjartan Ragnarsson.
2010 Gerpla. Leikgerð: Baltasar Kormákur, Ólafur Egill Egilsson og leikhópurinn. Leikstjórn: Baltasar Kormákur.
2010 Íslandsklukkan. Leikgerð og leikstjórn: Benedikt Erlingsson.
2011 Heimsljós. Leikgerð og leikstjórn: Kjartan Ragnarsson.
2014 Sjálfstætt fólk – Hetjusaga. Leikgerð: Símon Birgisson, Ólafur Egill Egilsson og Atli Rafn Sigurðarson. Leikstjórn: Þorleifur Örn Arnarsson.
2018 Atómstöðin – endurlit. Leikgerð: Halldór Laxness Halldórsson og Una Þorleifsdóttir. Leikstjórn: Una Þorleifsdóttir.
2026 Salka – ástin og dauðinn. Leikgerð eftir Unni Ösp Stefánsdóttur byggð á fyrri hluta skáldsögu Sölku Völku, Þú vínviður hreini. Leikstjórn: Björn Thors. Uppsetning Landnámsseturs Íslands í Borgarnesi í samstarfi við Þjóðleikhúsið.
Ýmsar leiknar dagskrár hafa verið fluttar til heiðurs Halldóri Laxness í Þjóðleikhúsinu. Á 75 ára afmæli skáldsins árið 1977 var flutt dagskráin Mannabörn eru merkileg í umsjón Bríetar Héðinsdóttur. Í tilefni af áttræðisafmælinu 1982 flutti Þjóðleikhúsið dagskrána Ég er vinur farfuglanna undir stjórn Baldvins Halldórssonar. Þann 23. apríl 1987 efndi menntamálaráðherra til afmælishátíðar í Þjóðleikhúsinu og sá Sveinn Einarsson um undirbúning hennar. Árið 1992, á níræðisafmæli Halldórs, var haldin þriggja daga Laxnessveisla í Þjóðleikhúsinu þar sem fluttir voru sviðsettir leiklestrar á Straumrofi, Strompleiknum, Prjónastofunni Sólinni og Veiðitúr í óbygðum, auk hátíðardagskrár með ljóðalestri og leik- og söngatriðum í umsjón Þórhalls Sigurðssonar.
Sjá nánar um Halldór Laxness á vef Gljúfrasteins .
