Kristofer Rodriguez Svönuson er íslensk-kólumbískur slagverksleikari og tónskáld. Hann er höfundur tónlistar og sér um tónlistarstjórn í Gæðablóð í Þjóðleikhúsinu í vetur. Kristofer útskrifaðist úr FÍH árið 2014 og hefur stundað slagverksnám í Kólumbíu, á Kúbu og Spáni. Hann er jafnframt menntaður grunnskólakennari og hjúkrunarfræðingur. Kristofer hefur starfað með mörgum af fremstu tónlistarmönnum landsins, þar á meðal Mugison, Júníusi Meyvant, Ásgeiri Trausta, Ragnheiði Gröndal, Tómasi R. Einarssyni, Reykjavík Big Band og Samúel Jón Samúelsson Big Band. Hann gaf út plötuna Primo, sem var tilnefnd til Íslensku tónlistarverðlaunanna 2020. Árið 2024 var hann útnefndur bæjarlistamaður Kópavogs. Watachico er nýjasta tónlistarverkefni Kristofers og er plata væntanleg á þessu ári.