Norræna leikskáldalestin - leiklestrar

Norræna leikskáldalestin - leiklestrar í Kassanum í Þjóðleikhúsinu, laugardaginn 25. og sunnudaginn 26. ágúst kl.15:00. Leikstjóri er Charlotte Böving. Ókeypis aðgangur er að lestrunum.

Boðið verður upp á leiklestra úr þeim fimm leikritum sem valin hafa verið í Norrænu leikskáldalestina 2012-2013, en hún kemur í stað Norrænu leiklistarverðlaunanna sem áður voru veitt einu leikskáldi á Norðurlöndunum annað hvert ár. Fimm leikskáld, eitt frá hverju landi, ferðast á milli landanna, og lesið er upp úr verkum þeirra.

Leiklesið verður á ensku úr eftirtöldum verkum: Hænuungarnir eftir Braga Ólafsson (Ísland), Ingen Møder Nogen eftir Peter Asmussen (Danmörk), Meganin Tarina eftir Tuomas Timonen (Finnland), Jeg forsvinner eftir Arne Lygre (Noregur) og Mira går genom rummen eftir Martina Montelius (Svíþjóð).

Leiklistarsamband Íslands á frumkvæði að Norrænu leikskáldalestinni og er hún samvinnuverkefni LSÍ og félaga í Norræna leiklistarsambandinu, höfundastofa og upplýsingamiðstöðva leiklistar á Norðurlöndum. Í hverju landi eru lestrarnir haldnir í tengslum við hátíðir, hér á landi um leið og alþjóðlega leiklistarhátíðin Lókal og Reykjavík Dance Festival fara fram.

Leiklestrar 25. og 26. ágúst kl. 15:00 í Kassanum.